大公网6月19日讯 据香港《东方日报》报道，香港青年联会（青联）前日举行周年大会，加入青联第十一个年头嘅常务副主席霍启刚以大热姿态接任第廿一届主席，仲以三十三岁之龄成为青联历来最年轻嘅主席！据可靠消息透露，启刚同“跳水公主”郭晶晶嘅爱情结晶，会紧随启刚九月就职后嘅十月出世，而且仲系男丁添，认真双喜临门！
下月一日先正式接棒嘅启刚满腹大计，前晚透露未来一年除咗瞓身处理会务，继续举办“爱家日”同招工日等会内原有嘅大型项目外，更有意开设课程，培训有志从政嘅会员，为社会提供优秀嘅政治人才。唔知启刚会唔会向曾经担任立法会议员多年嘅爹哋霍震霆偷吓师，或者邀请政界猛人向热血会员过两招呢？
虽然启刚咁有谂头，但对从政之路就耍手拧头，只系笑笑口话“慢慢嚟啦，迟啲先算”，叫卓妮倾番青联会务咁话。至于郭晶晶腹中块肉，护妻心切嘅启刚亦例牌封口，对大家排山倒海嘅祝福都只系以“收到！”作回应，细佬霍启山亦唔肯透露打算送咩礼物畀侄仔，实行全家上下一心齐齐封口，畀晶晶静静哋安胎。
晶晶预产期十月
中华全国青年联合会（全国青联）两年后就换届，而青联作为全国青联嘅跳板，启刚分分钟有望更上一层楼，进身全国青联副主席。
不过，身兼天津市政协嘅启刚嚟紧十月就会同晶晶添多一个家庭新成员，希望佢兼顾工作之余，都要抽时间帮手凑仔至得！
