霍启刚（左起）与飞鹰球队主力吕楚威、香港篮球代表队主力方诚义切磋球技，右一为卢继祥。
大公网7月15日讯 据《东方日报》报道，近日家庭同公职两头忙嘅青年联会主席霍启刚，前日以运动装现身祖苗文化交流中心一个内地体育训练团启动礼，并即场同两位星级篮球员切磋球技。启刚笑言，自己对篮球唔系咁在行，但自爆读书时已经锺意打羽毛球，莫非系受到妈妈朱玲玲嘅影响？启刚又话，虽然依家好忙，仍会间中抽时间同妈妈打番场波，认真有孝心。
青联于上月底举办嘅“锋云”论坛，有朝霆创办人谢霆锋及阿里巴巴创办人马云做讲者，反应甚佳。启刚话，第一次搞论坛就咁成功，令佢相当有压力，依家已经急不及待同一班青联嘅兄弟姊妹开会，齐齐积极“脑震荡”，订下未来一年嘅鸿图大计，期望之后每一个活动，能够愈办愈出色。
派老婆帮青联宣传？
启刚笑言，必要时会出动埋“王牌”做宣传喎。佢张“王牌”系乜？唔使讲都知，咪就系太太郭晶晶罗！唔知佢迟吓会否带埋“小启刚”出嚟加大宣传力度？讲番个训练团，该中心理事长卢继祥话，趁住北京奥运会五周年举办呢个训练团，希望提升京港两地青少年嘅运动水平。
