囍雨没断章取义，亦唔习惯做“标题党”，即管引述其中一段畀大家评评理：“现时香港并非缺地，而是中国新移民实在太多。由回归至今，已有超过70万中国人取得单程证来港定居，因此港人的平均居住面积越来越小。香港政府应向中国政府取回单程证审批权，减少中国新移民，才能针对房屋问题的核心。”
讲真，囍雨睇完好唔自在！范、毛一干人等，明显就系将香港人住居问题推晒落新移民身上，暗示佢哋抢香港人资源、抢香港人饭碗，呢种论述够唔够全面，睇怕都唔使我逐点去驳斥。
由于个心太唔舒服，囍雨上网睇咗唔少资料，知道大部分新移民，其实都系香港永久性居民的的屋企人，有老公、老婆、父母同仔女，而且“家庭团聚”天经地义，更加系联合国都认可的“人权”之一！范、毛议员身为“民主派”，唔系要捍卫“人权”咩？唔通佢两个为咗吸引激进少数选票，连普世价值都可以置之不理？要香港人妻离子散？
我喺度呼吁，范、毛两位议员，你哋既然咁威去带头歧视新移民，不如就倡议埋“唔畀香港人同内地人结婚”，咁咪没咁多新移民啰！反正你都剥削得“家庭团聚权”咯，不妨剥削埋香港人“结婚权”吖！两样都系“人权”之嘛。
仲有呀，唔知大家知唔知，香港永久居民同外国人结婚，配偶好快就可以来港定居，仲即时有身份证，可以喺香港返工！内地人呢？申请张单程证都要几年，期间只可以持双程证来港“探亲”。前睇后睇、左睇右睇，呢种已经系“歧视”，只不过中央同特区政府知道，没任何限制，香港会不胜负荷，所以先容许“香港特别行政区”去“歧视”“国家”。
讲句实际，你再唔喜欢都好，新移民既然嚟咗香港，成为香港一份子，佢哋有住屋需要，政府使唔使理？记住呀，佢哋已经系“香港人”，系不折不扣“香港人”！范、毛两位立法会议员，希望佢两位抚心自问，自己上一代、甚至再上一代，会唔会曾经都系新移民？人同此心，佢两位今次带头玩“歧视”，对唔对得住自己上一代，又对唔对得住香港呢个“移民城市”？
