鄧家彪與小明醫生齊唱護眼操歌

鄧家彪

　　大公網6月29日訊 （記者黃昱） 暑假快到喇！最開心梗係有得放假嘅學生哥啦！因為暑假期間，除咗可以放任咁玩同放任咁睇電視之外，仲可以放任咁打機。不過呢啲任性，就對雙眼唔係咁好喇。身為人父嘅工聯會立法會議員鄧家彪（Bill）對此特別有感受，所以話誓要推廣護眼操，再搵埋有小明醫生之稱嘅李家仁醫生唱返首《小明愛護眼》，嚟宣揚一下愛護眼睛嘅重要性喎。

　　鄭晴聽聞，阿Bill已經搵咗小明醫生御用嘅作曲及填詞人韋然出手相助，小明醫生亦表示會認真考慮唱唔唱呢首歌，所以成事機會都幾大（口架），阿Bill認真大面囉。至於點解阿Bill唔親自落場？咪就係因為佢歌喉麻麻，費事趕客囉！而除咗護眼操同護眼歌之外，阿Bill仲特意訂製咗冰涼眼罩，同眼鏡形裝嘅筆嚟提醒青少年人要注意用眼喎。