王國興再拍片解構牛仔褲 與郭偉強再攜手拍宣傳照

　　大公網6月29日訊（記者鄭晴）工聯會立法會議員王國興繼日前拍片解構自己鍾情格仔衫嘅原因之後，今日推出另一條短片，同網民解構埋自己嘅下半身－牛仔褲喇！今次條片沿用上次嘅「洗腦式自白」風格，不斷狂loop興哥鍾意著牛仔褲嘅原因：「牛仔褲，幾好丫！貪佢夠晒堅韌、襟磨襟蝕！」後面仲加插一堆着住牛仔褲嘅中外型男，包括尊尼特普、奇諾李維斯、畢彼特、余文樂、吳彥祖等等嚟「吸睛」添。

　　鄭晴今日響立法會撞到興哥，即刻捉住佢問下對呢兩條短片嘅意見。佢大讚創作團隊有創意、表達手法好「貼地」，輕輕鬆鬆咁將「堅韌」、「堅持」呢啲信息表達出嚟，仲笑笑口話有街坊睇完都話「好過癮」添。興哥話，70個立法會議員入面，得佢係會長期著格仔衫、牛仔褲，形象夠晒鮮明咁話喎。至於未來會唔會「解構」下點解咁鍾意「寫大字」呢？興哥就話「可以研究下」。

　　除咗拍片解構自己嘅衣著，興哥最近亦再度同黨友郭偉强一齊影宣傳照。兩個人握住手微笑，相嘅角落就印咗「工道，傳承」四個字。興哥話，自己同阿强一齊爭取男士侍產假已經好多年，大家響議會入面一直拍住上。唔知今次會唔會好似上次男士侍產假嗰張海報咁，俾啲網民笑佢哋「hehe」呢？

　　作為勞工界代表嘅阿强就話，自己控制唔到網民點諗，而同興哥影宣傳照係為咗帶出工聯會有團隊精神、著重「傳承」嘅訊息：「我哋嘅發展經歷相近，佢做過功能組別（勞工界），代表到工聯會兩代人嘅協作」。